ايش اقدر أسوي قبل 2018 ؟؟

كل شخص له أهدافه وطموحه وكل سنة وخصوصاً بداية السنه الجديدة يفكر بحياته ويقرر بعض الأهداف بس الأهم كتابتها وتحليلها وتقسيمها تلقون شرح لتحقيق الاهداف بمدونتي القديمة ( مدونة 2016 لتحقيق أهدافك )

بمدونتي اليوم راح احكي عن ايش تقدر تسوي ب3 شهور ونص عشان تكون راضي عن نفسك في ليلة السنة الجديدة ,,

لأنو شعور جداً جداً جداً مرعب لمن تحس سنة راحت من حياتك وعمرك وما قدمت لنفسك اي شي ,,

ومن اليوم عندنا 3 شهور و 15 يوم على 2018 ,, تذكر اذا انجزت 55% من أهدافك أو أكثر معناتو وضعك بالسليم لأنك تجاوزت النصف وهذا شي جميل ,, والسنة القادمة تحاول من بداية السنه ترتب أمورك وتزيد هذي النسبة ,,

النفس البشرية أمارة بالسوء بلإضافه إلى نشئتنا اللي فيها بعض الإحباط  والأعذاااااااار اللي مالها أساس من الصحة ,, سبب كتابتي لهالمدونة انو قلت  في نفسي : "أوف وصلنا ل سبتمبر وأنا ما عملت داك الشي ولا دا ولا دا أووووف خلاااص راحت سنة 2017 على الفاضي وضيعتيها" " دراما كوين لمدة دقائق "

بعدين صحصحت ورجعت أسمى اللي مو دراما كوين وقلت : خذي ورقة وقلم وأرجعي لأهدافك وأكتبيها وشوفي أيش أنجزتي وأيش لسا ولا تقللي من قيمة أي شي إنتِ عملتيه ولو بسيط أول خطوات رفع الإستحقاق إنك تحترم إنجازاتك البسيطة جداً لأن هي اللي تصنع المعجزات الكبيرة ..

واللي من الأساس ما كتبوا قائمة بأهدافهم عاااااااادي جداً " في وسوسة بتجي بمخك الان تقلك مع السنه الجديدة أبد " لا لا لا لا لا لا لا تعوذ من إبليس لو سمحت  ابدأ الأن  والأن حركات أبدأ رجيم يوم الأحد ما نبيها ههههههه  أبدا الأن لا تنتظر دقيقة وأعمل اهداف بسيطة وقصيرة للفترة المتبقية من السنه الحالية عشان تحس بشعور الإنجاز  والسنه الجديدة حط قائمة أطول .

راح أشارككم اليوم شغلات بسيطة سويتها خلتني أحس بالفخر من نفسي وبنفس الوقت تحمسني إني ما أضيع أي وقت بالفترة القادمة عشان أرفع نسبة نجاحاتي ,,

(( قد يكون الهدف مو بالكمية وأنا أوؤيد هذا الشي المقصد هنا مو بالكمية المقصد هنا إنو تنتبه لوقتك يعني مو الهدف كم عدد الكتب اللي تخلصها بس الهدف إنك ما تضيع وقت طويل ب ولا شي ,, يعني لمن تشوف القائمة تقول بدل مو أنا منسدح وما أعمل شي خل أقرأ ومنها أرفع نسبة تحقيق هدف القراءة لهالسنة ))

ما أدري إذا في كثير ناس زيي أو لا ,, بس انا أحب كل شي يكون قدامي عشان لمن أغفل عنه أرجع أشوفه وأتذكر ,, بالمختصر جدار غرفتي كله أوراق ورسومات وجداول وتقويم وكل شي وجنبي بالسرير كتبي وقرآني ودفاتري والبلانر وكل شي ..كريماتي خرابيطي كل اهتماماتي تكون بارزة أشوفها بعيني يمكن اقدر اقلكم ان دواليبي نص فاضية كل شي برا هههههههه

المهم فقررت أعمل شغلة وحبيتها وحبيت أنقلها لكم في حال حبيتوا تطبقونها أو تطبقوا شغلات مشابهه وأي شخص عنده فكرة مشابهة يقدر يشاركنا تحت بالتعليقات ,,

اقسم أهدافي اللي بداية السنه كاتبتها ومرتبتها ومقسمتها على الشهور وبعضها سحبت عليها وما بديت فيها أصلا" للي حاب يشوف "طريقة تقييم اهدافي يضغط هنا"  وقررت أكتبهم  على شكل قوائم بحيث إسم الهدف فوق وتحته فرااااغ ,, وأعلقها بالجدار وأسوي شعار فوق القوائم يحفزني إني أنجز وما أتكاسل ,,

أخترت عبارة  

"ASMA IS THAT YOUR LIMITS   ???"

صيغة السؤال تخلي عقلك الواعي واللاواعي يشتغلون يدورون الإجابات ,,

حاول ما تجاوب جواب وتسكت عقلك لا عادي مو شرط تجاوب ,, كل يوم أشوفها أكثر من مرة وأسأل نفسي هل هذي اقصى حدودك يا أسمى ؟؟ ولا في كمان ؟؟؟؟؟؟؟؟؟؟؟؟؟؟؟؟؟؟؟؟؟؟

 أخذ الجوانب اللي تهمني وأقسم محتواياتها مثال : الجانب الروحي ,, مقسم على المحافظ على النوافل و قراءة ورد قرآني كل يوم ,, حفظ جديد ومراجعة القديم ,, اعمال خيريه وهكذا ,, أي شي أعمله ولو صغير أكتبه بقائمة الجانب الروحي وهكذا بقية الجوانب ,,

بحيث اي خطوة ولو بسيطة في سبيل تحقيق هذا الهدف أكتبها ,, وبكذا يوم 30 ديسمبر وقت الإحتفال بnew year

 أكون أنا احتفل وأنا أحسب نسبة إنجازي بكل هدف وقد ايش تقدمت فيه ,,

لأنو باختصار كل محا اشوف القوائم معلقه بقول لنفسي : تبغينها فاضية ؟؟ تبغين النسبه أقل من طموحك؟

بصور لكم طريقتي لتطبيق الفكرة سويتها بشكل يجذبني ومحبب لقلبي خليت كل جانب له ورقة A4, ملونة ووزعت عبارات تحفيزية على الأطراف ,, يمكن تطبقونها وممكن تستلهمون منها أفكار مشابة تناسبكم ,, يعني مو شرط أوراق الملونة ممكن بيضاء وتكتبوا بأقلام ملونة أو حسب ما يجذبكم أنتوا ,, ممكن  يكون بدفتر بس أنا أحب أعلق كل شيء قدام عيوني ,,

كمان خطر ببالي إنو دائماَ أقول ايش الأشياء اللي أسعدتني هالسنة؟؟ لحظات يجيك شعور وقت حزن يخليك تنسى كل سعادة مريت فيها وهذا تصرف بعيد كل البعد عن الإمتنان لله والحمد والشكر لأبسط وأصغر الأمور لأكبرها وعشان كذا حطيت قائمة سميتها " ايش أسعدني ب 2017 ؟؟ " وأكتب فيها المواقف الحلوة أو الهدايا أو أي حدث دخل فرح ل قلبي ,,

وقائمة ثانية " يلا أخرجي من منطقة راحتك " وفيها أذكر أي تصرف أو حدث أو شي سويتها وكسرت فيه حاجز خوف أو تردد وجربت فيه اشياء جديدة أكسر فيها الروتين والملل "

اضغطوا على الصور ح تكبر وتكون أوضح ,,

وبكذا أكون خلصت دردشتي البسيطة معكم  أنوي من أعماقي تفيدكم أو تضيف لكم ويسعدني كثيييير تشاركوني أفكاركم أو تطبيقكم ,, أنتظر تعليقاتكم ,,

لا تنسوا تشوفوا مدونتي الثانية للي حاب يشوف تفاصيل اهدافي"" هناااااااااااا ""

أسمى الشهري