ليش ما أشبه برجي !


بسم الله الرحمن الرحيم



كيييفكم ؟؟ وحشتوني :$ بهالمدونة حتكون عن موضوع كثيييير يمر ببالي ودايم تجيني أسئلة أو أشوف كومنتات وردات فعل ناس عن رائيهم عنهم , وأبغى أقلكم رائيي الشخصي ,



موضوع الأبراج وأنماط الشخصيات

,, و رجاءاً بخصوص الأبراج حلال وحرام مو موضوع نقاشي , لكن للي حاب يقرأ يتفضل هنا




شخصياً أؤمن بلأبراج وبأنماط الشخصية ,, وأستفدت منها كثير بشكل إيجابي وراح أخبركم كيف ,,



أولاً إيماني فيها مو يعني أهز راسي وراء كل كلمة إنذكرت وأتوهم إنها صح ,, (( هذا أكثر عذر عن المحللين أنو هالتصنيفات وهم )) اللي ما عندو عقل ويتوهم بكيفه ,, أنا هنا أناقش الواعين  اللي حابين يفيدوا نفسهم .

تحليل الأبراج لا أتبع إلا خريطتي الفلكية الخاصة وليس الكلام العام والشامل اللي ينقال بكل موقع وكل اكاونت , لانو مستحيل الناس كلهم ينقسمون ل12 شخصية حسب الأبراج أول 16 حسب انماط الشخصية ,,

الموضوع دقيق وعميق وليس سطحي كما يظن الكثير

لمن بديت التعرف على خريطتي الفلكية ونمط شخصيتي بشكل واااااااعي جداً جداً جداً  في سبيل السعي الدائم لإجاد ذاتي وحقيقة ( أسمى ) الداخلية ,, وومنها قدرت أفهم نفسي وأتقرب منها وأرحمها وما أقسى عليها ,, لأننا أنولدنا بشخصيات مختلفة والمجتمع فرض علينا نكون بشكل أخر , إذا ما كنا بنفس الوضع والشخصية المطلوبة مننا إجتماعياً فنكون تحت ضغط نفسي إنو عندنا مشكلة أو خلل وممكن نشك بإضطراب نفسي ,



وبما إني قلت بشكل واعي ( معناه مو كل ما أقرأ صفة أو ميزة أو سلبية اقول ايه صدق صدق وكأني مجرد ببغاء للي ينكتب بدون وعي  )

المهم أنا كنت أسدية وبنمط شخصية INFJ  حسب إختبار MBTI    " لأحظوا كلمة كنت "



ليش كنت ؟؟ لأن قبولك لصفاتك الإجابية والسلبية كما هي وبقائك عليها هذا ما يدخل شي جديد لحياتك ممكن بس ضميرك يرتاح لأنك فهمت أسباب غضبك وضيقتك وزعلك وبعض مشاعرك الغريبة .. لكن إذا كذا أكتفيت !!! ف خلاص قفل هالموضوع لا تكمله لأنه محا يهمك .



بحكيلكم مثال بسيط عن إيش استفدت من تحليل الخريطة الفلكية ,, كنت لحظات أزعل واعصب من ماما لسبب مجهول ؟؟؟ متخيلين كمية تانيب الضمير والحالة النفسية اللي ادخلها لأني أعصب وأصارخ وأزعلها مني والسبب مجهول؟؟ بديت أشك فيني إنفصام شخصية  ومرا كنت افضفض لوحدة قالت يمكن جتكم عين هههههه ولا مسحورين المهم كان الوضع مسبب لي نفسية معفنه إنو كيف اعصب واصارخ ومافي سبب وادخل غرفتي زي المجنونة اقول لنفسي: امك كلامها عادي وبسيط وعادي ايش اللي عصبك ؟ شكلك مريضه فيكي بلاء !!!!!



وبيوم بديت أحلل خريطتي الفلكية أكتشفت إني ما احب أسلووب النصيحة اللي يحسسني فيه الطرف التاني إنو هو أفضل وأفهم وأعرف مني ,, وينرفزني التدخل بخصوصياتي بشكل مبالغ ,, وماما الله يسعدها ويطول بعمرها كانت دايم سوالفها ( أنا أكبر منك وأفهم وجربت الدنيا أحسن منك ) وهنا كنت اعصب وما ادري ان هالكلمات هي السبب هههههههه أو تكون تدخل بطريقة كلامي أو تفكيري بالحياة فكنت أعصب وما أدري ليش لانو كلامها عادي بس داخلياً مو عادي شخص يقلي ( غيري من اسلوبك وصيري كدا وصيري كدا ) بعقلي اللاواعي ومن جواتي انو دا انتهاك لخصوصياتي  ,, والحل ؟؟ أولا عرفت السبب فصرت أطول بالي على نصائح وأسلوب ماما وثانياً صارحتها وقلت يا ماما لمن تنصحيني إنصحيتي بشكل إقتراح انو بلاخير القرار قراري وليس أمر او انك افضل مني لانو دا الشي ينرفزني ,, وأبشركم رجعنا سمن على عسل 😊



وبكذا الإنسان يستفيد ويغير نفسه للأفضل وليس عشان يقول انا كدا خلااص لازم اتقبل هالعيوب وغصب الكل يتقبلني زي ما انا ,, لا لا في أشياء تضر بنفسيتك وحياتك الإجتماعية , احنا عايشين وسط مجتمع مو معقولة نجلس بمشاحنات وضغوط نفسية طول الوقت على أساس احنا من البرج الفلاني ولا من النمط العلاني ,,



انا أعتبرها نعمة ساعدتني بفهم وتقبل نفسي وتغيير نفسي للأفضل , عندي بعض الصديقات المتعمقين بلأبراج مثلاً يقولون ما نصدق أنك ( من برج الأسد ) وانتي مافيك كدا وكدا وكدا ,, أقلهم إنو زمان كنت كدا بس الأن انا بديت اكون شخصيتي بشكل أفضل وأخفف من الصفات اللي ما أحبها او مو مريحتني ,, صحيح لا زلت مهايطية كلأسديين بس في تطور ههههههههه





لذلك شلت كلمة أسدية و INFJ  من بايو التويتر لأنو أعتبر نفسي الأن لا أصنف من ضمن هالشخصيتين بديت اكون شخصية فريدة فيني ,,





أتمنى لكم التوفيق وتعرفوا ذاتكم أكثر وأكثر  أي تجارب أو قصص فادتكم شاركونا بالكومنتات









أسمى الشهري




تعليقات

  1. شكرا قليلة لك لكن ما نملك غيرة وبالتوفيق

    ردحذف
  2. كلامك منطقي.. وصراحة أعطيتني وجه نظر جديدة. التقوية من صفاتنا الإيجابية والتعامل مع صفاتنا السلبية. شكرا على المقالة

    ردحذف

إرسال تعليق

المشاركات الشائعة من هذه المدونة

كتاب " السماح بالرحيل "

الإكتئاب ,, يا أنا ,,, يا أنت

كتاب " الأنثى هي الأصل " للدكتورة نوال السعداوي